අපි ප්ලෑන් කළේ
අම්මගෙ ඇස්‌පෙනීම
නැති උනාම
අපට හැමදාම විනෝද
වෙන්න පුළුවන් ක්‍රමයක්
"මේ කෑම්ප් එකේ උඹලට හොඳින් ඉන්න ඕනෙ නම් මම කියන විදිහට වැඩ කරන්න ඕනෙ. එහෙම බැරි එකෙක්‌ ඉන්නව නම් මගෙන් සල්ලං නොවී වෙන කෑම්ප් එකකට යන එක හොඳයි..."
කෝපයෙන් කෑගසන ඩිලානිගේ හඬ කන්වලට යවුල් වලින් අනින්නාක්‌ බඳුය. ඇගේ හඬ පිරිමියකුගේ කට හඬට සමානය. ඇගේ හැසිරීම මෙන්ම ශරීර ලක්‍ෂණ පවා තරුණයකු මෙන් විය. සුන්දර යුවතියක භාවිත කරන සුකුමල වචන වෙනුවට ඇගේ මුවග රැඳී තිබුණේ අමු තිත්ත කුණුහරුපය.
උතුරුකරයේ එක්‌තරා හමුදා කඳවුරක රාජකාරි කරමින් සිටි ඩිලානි තිස්‌ විය නොඉක්‌මවූ තරුණියක වූවාය. ඩිලානිගේ හැසිරීම මෙන්ම ගති ලක්‍ෂණ නිසාම ඇයට හමුදා කඳවුරේ සෙබළියන් අතර මුල් තැන හිමිව තිබුණේ නිතැතින්ය.
කඳවුරේ කාන්තා සෙබළියන්ගේ භට නිවාසය භාරව සිටියේ ද ඩිලානිය. හැමවිටම ඇය දරදඬු පාලනයක්‌ ගෙන ගියාය. කඳවුරේ කිසිම සෙබළියක්‌ ඇගේ වචනයට ඇගේ නියෝගයන්ට පිටින් ගියේ නැත. සුන්දර තරුණියක වූ චතුරිකා රාජකාරි කළේ ද මේ කඳවුරේය.
