ඔලුවට කොන්ක්‍රීට්‌ ගලකිනුත් ගහලා...
මීගමුව කිඹුලාපිටිය අස්‌වැද්දුම ළිඳ ප්‍රදේශයේ නිවසක්‌ තුළදී 17 හැවිරිදි සුරූපී යුවතියකට පසුගිය 23 වැනිදා පිහියකින් ඇන සාහසික ලෙස ඝාතනය කිරීමේ සිද්ධියක්‌ අප වෙත වාර්තා වෙනවා.
සැකපිට අත්අඩංගුවට ගත් සජිත් මදුශංක (22) නමැති සැකකරු එම ඝාතනය සිදු කිරීමේ සිද්ධියට මාස දෙකකට පමණ පෙර සිට සැලසුම් කර ඇති බවත් ඒ සඳහා අවශ්‍ය උල්පිහිය 2012 දෙසැම්බර් මස මිලදී ගෙන ඇති බවත් මූලික පොලිස්‌ විමර්ශනවලදී අනාවරණය වී තිබෙනවා.
මදුශංක නැමැත්තා එම ඝාතනය සිදු කිරීමට පෙර දින රාත්‍රි සිට පිහියද අතැතිව මියගිය තැනැත්තියගේ නිවස අසල පිහිටි වෙල්යායක කුඩා මඩුවක්‌ තුළ සැඟ වී යුවතිය ඝාතනය කිරීම සඳහා නිදි නොලබා
රැය පහන් කරමින් රැක සිටි බවද අනාවරණය වී තිබෙනවා. අත්අඩංගුවේ පසුවන මදුශංක නැමැත්තා 2010 වසරේ බළන්ගොඩ, කල්තොට ප්‍රදේශයේ සිට රතිඤ්ඤ කම්හලක සේවය කිරීම සඳහා මීගමුවට පැමිණ තිබෙනවා.
පසුව ඔහු මෙම සිද්ධියේදී මියගිය යුවතිය දැක ඇයට පෙම් කිරීමට පටන් ගෙන තිබෙනවා. එහෙත් යුවතිය එම පෙම ප්‍රතික්‍ෂේප කර ඇති අතර අවසානයේ ඇයට සැකකරු කරදරයක්‌ බවට පත්වූ අවස්‌ථාවේ ඒ බව ඇගේ වැඩිමල් සොහොයුරන් දෙදෙනාට දන්වා තිබෙනවා.
එහිදී එම සොහොයුරන් දෙදෙනා සැකකරුට තම නැගනියට කරදර නොකරන ලෙසට අවවාද කිරීමෙන් අනතුරුව එම සොහොයුරන් දෙදෙනා සහ යුවතිය ඝාතනය කිරීමට සැලසුම් කර සැකකරු පිහිය මිලදී ගෙන තිබෙනවා. යුවතිය ඝාතනය වූ දින මදුශංක නැමැත්තා ඇගේ නිවසේ සියල්ලන් රැකියාවට නික්‌ම ගිය පසු පිහියත් රැගෙන උදේ 6.00 ට පමණ ඇගේ නිවසට ඇතුළු වී තිබෙනවා.
එහිදී සැකකරු යළි වරක්‌ යුවතියගේ ආදරය තමාට පුද කරන ලෙසට ඉල්ලා සිටියත් යුවතිය එය ප්‍රතික්‍ෂේප කළ අවස්‌ථාවේ සැකකරු යුවතියට පිහියෙන් ඇන තිබෙනවා. ඔහු තරුණියගේ ගෙලට සහ පපුවට පිහි පහරවල් තුනක්‌ එල්ල කර ඇති අතර එහිදී යුවතිය බිම වැටුණු අවස්‌ථාවේ ඇයට සැකකරු යළිත් වරක්‌ පිහියෙන් ඇන්නත් පිහිතලය කැඩී තිබෙනවා.
පසුව එහි දොරක්‌ අසල තිබූ කොන්ක්‍රීට්‌ ගල් කැටයක්‌ රැගත් සැකකරු යුවතිගේ හිසට දරුණු පහරක්‌ එල්ල කර තිබෙනවා. එම යුවතියගේ කෑගැසීම් හඬ ඇසී අසල්වාසීන් එහි එක්‌ රොක්‌වූ අවස්‌ථාවේ සැකකරු නිවස තුළම පිහිය දමා පලා ගොස්‌ ඇති අතර එහිදී ප්‍රදේශවාසීහු සැකකරු අල්ලා මීගමුව පොලිසියට භාරදී තිබෙනවා.
