මෙම පහසුකම ජී.පී.එස්. රිසීවරය සහිත ජංගම දුරකතනයකට ඩවුන්ලෝඩ් කරගත හැකිබවත් දුරකතනයේ එම පහසුකම නොමැති නම් GPS උපකරණයක් මිලදීගත හැකි බවත් ඩයලොග් සමාගම විසින් සඳහන් කර ඇත.
මෙම සේවාව පිළිබඳව අදහස් දක්වමින් ඩයලොග් සමාගමේ ප්‍රධාන මෙහෙයුම් නිළධාරී, සුපුන් වීරසිංහ පවසන්නේ යුද්ධය අවසන් කිරීමෙන් පසුව උතුරු-නැගෙනහිර සංචාරක කටයුතු වැඩිවීම හා මාර්ග වැඩිවෙමින් තිබීම හමුවේ එම ප්‍රදේශවල මාර්ග ඇතුළුව මෙරට ඕනෑම ප්‍රදේශයක මාර්ගයක් මෙම සේවාව මගින් පාරිභෝගිකයාට කරදරයකින් තොරව සොයාගැනීමට අවස්ථාව ලැබෙන බවයි.මෙම සේවාවේදී සිංහල, දෙමළ හා ඉංග්‍රීසි යන භාෂා ත්‍රිත්වය මගින් හඬ කවන ලද අදාළ තොරතුරු සැපයෙන නිසා වාහනය පදවමින් සිටින විට අදාළ උපකරණය දෙස නොබලා යා යුතු තැන ගැන අවබෝධයක් ලබාගත හැකි බවද සඳහන්ය.
කුඩා නගරවල මාර්ගද ඇතුළත් කර ඇති මෙම සේවාව යටතේ මාර්ග වලට අමතරව ආගමික ස්ථාන, සංචාරක ස්ථාන, මූල්‍ය ආයතන, වාහන අළුත් වැඩියා කිරීමේ ස්ථාන, හදිසි ප්‍රතිකාර ස්ථාන, අවන්හල්, ඇතුළත් වැදගත් ස්ථාන 100,000 කට වැඩි තොරතුරු ඇතුළත් කර තිබෙන බව සමාගම පවසයි.
මෙම සේවාව සපයන අඟල් 3.5 ක තිරයක් සහිත GPS උපකරණයක් රුපියල් 26,990 කටත්, අඟල් 4.3 ක තිරයක් සහිත උපකරණයක් 32,990 කටත්, අඟල් 05 ක තිරයක් සහිත උපකරණයක් රුපියල් 38,990 කටත් ලබාගත හැකි බවත් මේවා සඳහා වසරක වගකීමක් හිමිවන බවත් සමාගම සඳහන් කර ඇත.
