ජෝර්දානයේ ගෘහ සේවිකාවක් ලෙස සේවය කරමින් සිටියදී වධ හිංසාවලට ලක්වූ බව කියන කාන්තාවක, අතක ඇඟිලිවල කැපුම් තුවාල සහිතව ඉකුත් (26දා) කුරුණෑගල ශික්ෂණ රෝහලට ඇතුළත් කරනු ලැබුවා.
ඇගේ ඥාතීන් විසින් ජෝර්දානයේ සිට ලංකාවට ආපසු ගෙන්වා ගැනීමෙන් අනතුරුව මෙලෙස රෝහල් ගතකරනු ලැබුවේ පොල්පිතිගම, සාලියගම ප්‍රදේශයේ පදිංචි රේණුකා දමයන්ති හේරත් නමැති 32 හැවිරිදි තිදරු මවකි.
මුල් මාස දෙක කිසිදු ගැටලුවකින් තොරව සේවයේ යෙදුණු නමුත් පසුව සෑදුණු බඩේ අමාරුවක් හේතුවෙන්, නිවැසියන් විසින් රෝහලක් වෙත රැගෙන ගිය බවත් එහිදී යම් එන්නතක්
විදිනු ලැබූ බවද ඇය පවසන්නීය. මෙම එන්නත විදිනු ලැබීමෙන් පසුව තමන් තාවකාලිකව සුවය ලැබූ නමුත් ඉන්පසුව නිතර නිතර ක්ලාන්තය සෑදී වැටෙන්නට පටන් ගත් බව ද ඕ කියන්නීය.
මේ සිදුවීමෙන් පසුව නිවැසියන්ගෙන් දැඩි ලෙස තාඩන පීඩන එල්ලවීම හේතුවෙන් තමා එම නිවෙසින් පැන ගොස් ජෝර්දානයේ ශ්‍රී ලංකා තානාපති කාර්යාලය යටතේ ඇති රැදවුම් මධ්‍යස්ථානයක රැඳී සිටිමින් තමා එරටට එවූ විදේශ රැකියා ඒජන්සිය අමතා තමා ආපසු ගෙන්වා ගන්නැයි ඉල්ලා සිටියද ඔවුන් එම ඉල්ලීම දිගින් දිගටම ප්‍රතික්ෂේප කළ බවද කියන්නීය.
රැඳවුම් මධ්‍යස්ථානයේදී තම ඇඟිලිවල තුවාලවලට කිසිදු ප්‍රතිකාරයක් නොලැබුණු බවත් තුවාල පැසවා ඉන් සැරව ගලනවා දුටු රැදවුම් මධ්‍යස්ථානයේ රඳවා සිටි අනෙක් ශ්‍රී ලාංකේය ගෘහ සේවිකාවන් විසින් එකතු කර දුන් මුදලින් ලංකාවට පැමිණීමට හැකි වූ බවත් කීවාය.
රේණුකා දමයන්තිගේ සැමියා වන ගාමිණී ගුණසේකර මහතා ප්‍රකාශ කළේ තම බිරිය පත් වී ඇති රෝගී තත්ත්වයන් ගැන ඇය විසින් තමාට කළ දැනුම්දීම්වලට අනුව ඇය රට යැවූ විදේශ රැකියා ඒජන්සියට ඒ පිළිබඳ අවස්ථා ගණනාවදී පැවැසූ බවයි.
ඒ සඳහා යන වියදමක් වේ නම් ඉඩමක් හෝ විකුණා ලබා දෙන්නට පොරොන්දු වී තම බිරිය ආපසු ගෙන්වා දෙන ලෙස ඉල්ලා සිටියද ඔවුන් ඒ පිළිබඳ උනන්දු නොවූ බවයි.
එබැවින් තමන් මේ පිළිබඳ විදේශ සේවා නියුක්ති කාර්යාංශයේ කුරුණෑගල කාර්යාලයටද පැමිණිලි කළ බවත් එම කාර්යාලය විසින් අදාළ ඒජන්සිය කැඳවා පරීක්ෂණයක් පැවැත්වූ බවද හෙතෙම පැවැසීය.
විදේශ සේවා නියුක්ති කාර්යාංශයේ කුරුණෑගල කාර්යාලය විසින් තම බිරිය ගැන පැමිණිලි කිරීමේදී එම කාර්යාලයෙන් පසුගිය දෙසැම්බර් 10 වැනිදා ඇය දිවයිනට පැමිණ ඇතැයි දිගින් දිගටම පැවැසූ නමුත් තම බිරිය ඒ වන විටත් ජෝර්දානයේ රැඳී සිටි බවද ඔහු පවසයි.
ඉකුත් 25 වැනිදා ඇය ජෝර්දානයේ සිට දිවයිනට පැමිණෙන බවවත් විදේශ සේවා නියුක්ති කාර්යාංශයේ නිලධාරීන් දැනුවත් වී නොසිටියේ යැයි ඔහු චෝදනා කරයි.
රෝහල් ගතකරනු ලැබූ රේණුකා දමයන්ති, පෙරේදා සැත්කමකට භාජන කිරීමෙන් පසුව තවදුරටත් කුරුණෑගල ශික්ෂණ රෝහලෙහි නේවාසිකව ප්‍රතිකාර ලබන්නීය. තුවාල වූ ඇඟිලිවලට අමතරව ඇයගේ දෑත්වල තවත් තුවාල කැලැල් රාශියක්ද දැකගත හැකි විය.
