ඉකුත් 22 වැනිදා අලුයම 4.30 ට පමණ අල්විස් මහතාගේ අනුරාධපුරයේ පිහිටි නිල නිවසට කඩා වැදුණු සෙබළෙකු සහ තවත් පුද්ගලයෙකු ඒ මහතාගේ මුහුණට ඇසිඩ් ප්‍රහාරයක්‌ එල්ල කර පළාගොස්‌ තිබුණු පුවතක් මීට පෙර අප ඔබ වෙත ගෙන ආවා. එහිදී බරපතළ පිළිස්‌සුම් තුවාල ලැබූ වෛද්‍යවරයා මේ වන විට කොළඹ ජාතික රෝහලේ ප්‍රතිකාර ලබමින් සිටිනවා. එහිදී ඔහුගෙන් අප කල විමසුමකදී ඔහු මෙසේ පැවසුවා.
මගේ ඇස් දෙකම පේන්නේ නැහැ. අක්ෂි ශෛල්‍ය විශේෂඥ වෛද්‍ය චරිත් ෆොන්සේකා මහතා මට ප්‍රතිකාර කරනවා. මගේ ඇස් දෙකේ කාච දෙකම පිළිස්සිලා. කාච සම්බන්ධ වන ස්නායුත් විනාශ වෙලා. දැනට අත්අඩංගුවේ පසුවන ප්‍රධාන සැකකරු පුවත්පත්වලට ලබා දී ඇති බොහෝ කරුණු වැරදියි. ප්‍රධාන සැකකරුගේ බිරියගේ මාරුවීම පිළිබඳව ඔහු කියනවා.
නමුත් ඔහුගේ බිරිය ගම්පහ ආයුර්වේද රෝහලට මාරු කර යවා තිබෙන්නේ මම ආයුර්වේද කොමසාරිස්වරයා වශයෙන් වැඩ බාරගැනීමට පෙරයි. මම එම මාරු වීම ගැන කිසිම දෙයක් දන්නේ නැහැ. එම මාරු වීම මට පෙර සිටි කොමසාරිස්වරයා කළ එකක්. ඒ උසස්වීමක් අනුවයි.
ප්‍රධාන සැකකරුට විනය පරීක්ෂණයක් තිබෙනවා. මම සැකකරුගේ රාජකාරියට කිසිසේත්ම බලපෑම් කර නැහැ. ඔහු උසස්වීමක් ඉල්ලා තිබුණා. එහිදී ආයතන ප්‍රධානියා ලෙස ඔහුගේ විනය පරීක්ෂණයක් තිබෙන බව මම දැන්විය යුතුයි. එය ප්‍රධානියාගේ රාජකාරියයි.
ඔහුට මින්නේරිය රෝහලට ස්ථාන මාරුවක් ඔහුගේ ඉල්ලීම පරිදි මා ලබා දුන්නා. අධ්‍යයන නිවාඩු පවා මා ලබා දී තිබෙනවා. ඒ ලබා දුන්නේත් ආණ්ඩුකාරවරයාගේ අනුමැතිය මතයි.
මට ඇසිඩ් ගැසූ බවට චෝදනා ලැබ සිටින ප්‍රධාන සැකකරුට මා හැම විටම වරප්‍රසාද ලබා දුන්නා. මට පුදුමයි ඔහු මේ වගේ දෙයක් කිරීම ගැන යැයි කුමාර අල්විස් මහතා පවසනවා.
ලෝකය දැක්ක මගේ ඇස් දෙකම කිසි සේත්ම පෙනෙන්නේ නැහැ. ප්‍රතිකාර සඳහා විදෙස් රටකට යවන්න වෙයි කියලා වෛද්‍යවරු කියනවා යැයි උතුරුමැද පළාත් ආයුර්වේද කොමසාරිස් කුමාර අල්විස් මහතා පවසනවා. කුමාර අල්විස් මහතාට පසුගියදා එල්ල වුණු ඇසිඩ් ප්‍රහාරය හේතුවෙන් මේ වන විට ඇස් රෝහලේ ප්‍රතිකාර ලබමින් සිටිනවා.
උතුරු මැද ආයුර්වේද කොමසාරිස්ට ඇසිඩ් ගැසුවේ පරණ කෝන්තරයක් පිරිමහගන්නද..?
