දකුණු අපි‍්‍රකානු රටක් වන ඝානාව සාමාන්‍යයෙන් මිථ්‍යා විශ්වාස සහ සම්ප්‍රදායන් එලෙසම රැකගන්නා රටවල් අතරින් එකක්. එහෙම වුණත්, ඝානා රටේ එක්තරා පුද්ගලයකුට අමුතුම ආකාරයේ කල්පනාවක් පහළ වුණා.
ඝානාවේ වැසියන් සාමාන්‍යයෙන් කවුරුන් හෝ මිය ගිය විට විශ්වාස කරන්නේ ඔවුන් අලුත් වෙනත් ජීවිතයකට පිවිසෙන බවයි. මෙලෙස මියගිය විට වෙනත් ජීවිතයකට යෑම සඳහා අලුත්ම ක්‍රමයක් ඉදිරිපත් කරන්න මේ පුද්ගලයාට අවශ්‍ය වුණා.
මොහු නමින් පා ජෝ. වයස අවුරුදු 67. වෘත්තියෙන් එරට මිනී පෙට්ටි තැනීමේ නියුතු අයෙක්. එහෙත්, පා එසේ මෙසේ කෙනෙක් නෙවෙයි මිනී පෙට්ටි තැනීමේ විශේෂඥයෙක්.ඔහු මෙතෙක් තමා තනාගෙන ආ සම්ප්‍රදායික මිනී පෙට්ටිවල හැඩරුව වෙනස් කරන්න තීරණය කළා.
අලුත් ජීවිතයක් සොයා යන ගමන අලුත් ක්‍රමයකටම යවන්නයි ඔහු උත්සාහ දරන්නේ. මේ සඳහා ඔහු සම්ප්‍රදායික මිනී පෙට්ටිය වෙනුවට නව ආරක මිනී පෙට්ටි තැනීම ආරම්භ කළා. ඔහුගේ මේ අලුත් මිනී පෙට්ටි දැන් දශකයක පමණ සිට ඝානාව පුරාම ප්‍රසිද්ධ වෙලා. මේ මිනී පෙට්ටියේ හැඩරුව පුද්ගල රුචිකත්වය අනුවත් වෙනස් වෙනවා.
කෙනෙක් මෝටර් රථ පැදවීම වෘත්තිය වශයෙන් කළා නම් හෝ ඔහු මෝටර් රථවලට කැමැතිනම් ඔහුගේ ඥාතීන්ගේ අනුදැනුම ඇතිව පා ඔහුගේ අවසන් ගමන යෑමට නිර්මාණය කළේ මෝටර් රථයක්.මෑතකදී මියගිය තවත් පුද්ගලයකු ජීවිකාව ගෙන ගියේ මාළු වෙළෙඳාමෙන්. පා ඔහු සඳහා තැනුවේ මාළුවකුගේ හැඩරුව ගත් මිනී පෙට්ටියක්.
ඒ විදිහට ඇඳුම් මහන්නකු සඳහා ඔහු මහන මැෂිමක් නිර්මාණය කළා.මත්පැන් බෝතල, බියර් කෑන්, දුම්වැටි, මිටිය වැනි විවිධ මිනී පෙට්ටි ඔහු අතින් නිම වුණා.ඒ විතරක් නෙවෙයි පා මිනී පෙට්ටි ලෙස සත්ත්ව අනුරූත් හදනවා. ඌරා ගේ සිට කුකුළන් දක්වාත් එතැන් සිට කැස්බෑවුන් වැනි මුහුදු සත්ත්ව අනුරූ ද ඔහු තනනවා.
පා ගේ මේ මිනී පෙට්ටි සාප්පුව ආරම්භ වුණේ 1950 දීයි. මිනී පෙට්ටි සාප්පුකරුවකු වුවත් පා සැබවින්ම හොඳ වඩුවෙක්.පා ගේ මිත්තණිය මියගිය පසු ඔහු ඇය වෙනුවෙන් තැනුවේ ගුවන් යානයක්.ජීවිතයටම ගුවන් යානයක නොගිය මේ මිත්තණිය ජීවිතයේ අන්තිම ගමන ගියේ ගුවන් යානයකින්.
මේ ලෙස ඔහු තැනූ මිනී පෙට්ටි ආකෘති අතර උකුස්සන්, මීයන්, මේසන් හැඳි, එන්නත් කටු, සිරින්ජර්, පොත්, කැමරා, රොකට්, පියානෝ සහ ඇණ මිටි ද වෙයි.මේ අතර එංගලන්තයේ හිටපු දක්ෂ සංගීතඥයෙක් මියගිය පසු පසුගියදාක ඔහුගේ ඉල්ලීම පරිදි ගිටාරයක අනුරුවකට සැදූ මිනී පෙට්ටියක සැතපවූ බව වාර්තා වුණා.
බීච් ලීයෙන් කළ මේ ‘ගිටාර් මිනී පෙට්ටිය තනන්න මාස ගණනක් ගතවුණාලු.මිනී පෙට්ටියේ දිග අඩි 12 යි.ජෝන් ග්‍රැහැම් නමැති මේ ගිටාර් වාදකයා සිය අවසන් ගමන් යන්න සකසා ගත් ගිටාර අනුරුව ඔහුට වයස අවුරුදු 15 දී තෑග්ගක් ලෙස ලැබුණු ඔහු ආසා කළ ගිටාරයේ අනුරුවක්.
