මොරටුව රාවතාවත්ත ප්‍රදේශයේ පිහිටි මෙම ළමා නිවාසය ලියාපදිංචි ආයතනයක්‌ ලෙස 1984 සිට මේ දක්‌වා පවත්වාගෙන යනු ලබන අතර කන්‍යා සොයුරියක්‌ එහි පාලිකාව ලෙස කටයුතු කරනු ලැබූ බව ළමාරක්‍ෂක අධිකාරිය පවසයි.
අධිකාරියේ පැමිණිලි භාර ගන්නා 1929 දුරකථන අංකයට ඊයේ (23 වැනිදා) ලැබුණු පණිවුඩයකට අනුව නිලධාරීන් කණ්‌ඩායමක්‌ එහි ගොස්‌ මෙම වැටලීම සිදුකොට ඇත. වැටලීම සිදුකරන අවස්‌ථාවේදී කුඩා ගැහැනු හා පිරිමි දරුවන්, දින කිහිපයක්‌ වයසැති බිලිඳු දරුවන් ඇති මව්වරුන් 15 දෙනකු හා ගැබිනි මව්වරුන් 06 දෙනකු එහි සිට ඇත. අනාථ දරුවන් රඳවාගෙන ඔවුන් දේශීය - විදේශීය ගැනුම්කරුවන්ට විකුණන බවට මේ වනවිට තොරතුරු ලැබී ඇති අතර දරුවන් බිහිකිරීමේ සිට විදේශයට විකිණීම දක්‌වා වූ මෙම මහා පරිමාණ ජාවාරමට සම්බන්ධ පුද්ගලයන් ගැන සොයා ඔවුන් අත්අඩංගුවට ගැනීමට පොලිසිය පරීක්‍ෂණ ආරම්භ කර ඇත.
ළමා නිවාසයේ පාලිකාවගෙන් මෙන්ම එහි සිටි මව්වරුන්, ගැබිනි කාන්තාවන්, තැරැව්කරු, දෙස්‌ විදෙස්‌ ගැනුම්කරුවන්ගෙන් ඊයේ (23 වැනිදා) දිනයේදී ළමාරක්‍ෂක අධිකාරිය ප්‍රකාශ සටහන් කරගෙන ඇති අතර ඔවුන් අද අධිකරණය හමුවට ඉදිරිපත් කිරීමට නියමිතය. මේ වනවිට ළමා නිවාසයට දැඩි පොලිස්‌ රැකවරණ යොදා තිබේ. ළමාරක්‍ෂක අධිකාරිය හා මොරටුව පොලිසියද එක්‌ව වැටලීම සිදුකර ඇති අතර ගල්කිස්‌ස පොලිස්‌ අධිකාරී රවීන්ද්‍ර කරවිට මහතා පරීක්‍ෂණවලට සහාය වී ඇත.
මෙම ළමා නිවාසයෙන් දරුවන් විකිණීමේ ජාවාරම කාලයක සිට සිදුකර ඇති බවට අධිකාරිය සැක කරයි. මේ වනවිට දරුවන් කී දෙනෙක්‌ විකුණා ඇත්ද, දරුවන් ගෙනගියේ කෙසේද, දරුවන් මිලදී ගත්තේ කවුරුන්ද, විදෙස්‌ ගැනුම්කරුවන් දරුවන් රටින් පිට කළේ කෙසේද යන්න පිළිබඳව තොරතුරු සොයා බැලීමට පොලිසියේ සහාය පතන බව ළමාරක්‍ෂක අධිකාරියේ ප්‍රකාශකයෙක්‌ පැවසීය.
