2013 වර්ෂයේ ජුලි 14 වැනිදා හෝ ඊට ආසන්න දිනයකදී වයඹ හිටපු පළාත් සභා මන්ත්‍රීවරයාගේ දියණියගේ ගවුමේ වාටිය ලිහා දැමීමේ සිද්ධිය සම්බන්ධව එම මන්ත්‍රීවරයා විසින් මෙම
ගුරුවරිය දණගැස්‌සවීම පිළිබඳව එම මන්ත්‍රීවරයා නවගත්තේගම පොලිසිය මගින් අත්අඩංගුවට ගෙන පුත්තලම දිසා අධිකරණයට ඉදිරිපත් කළ අවස්‌ථාවේ රක්‍ෂිත බන්ධනාගාරගත කරන ලදී.
පසුව ආණමඩුව සංචාරක උසාවියේ නඩුව කැඳවූ අවස්‌ථාවේ ඇප ලබා දුන් නමුත් තව දිනකදී ඇප කොන්දේසි උල්ලංඝනය කිරීම හේතුවෙන් යළිත් රක්‍ෂිත බන්ධනාගාරගත කරන ලදී.
අනතුරුව දැඩි කොන්දේසි මත ඇප මත මුදාහැරි හිටපු මන්ත්‍රීවරයාට එරෙහිව නීතිපතිවරයා විසින් පුත්තලම මහාධිකරණය හමුවේ චෝදනා ගොනුකර තිබිණි. ඒ අනුව පුත්තලම මහාධිකරණ විනිසුරු ප්‍රියන්ත ප්‍රනාන්දු මහතා ඉදිරියේ නඩුව විභාග කෙරිණි.
රජයේ නීතිඥ ලිශාන් රත්නායක, පද්මලාල් වීරසිංහ, ප්‍රියන්ත ගමගේ යන මහත්වරු පැමිණිලි පාර්ශ්වය වෙනුවෙන් පෙනී සිටියහ. විත්තිය පාර්ශ්වය වෙනුවෙන් නීතිඥ තිවන්ත අත්තනායක, ජනාධිපති නීතිඥ අනිල් සිල්වා, නීතිඥ රසික කුමාර, නීතිඥ නන්දි නවාවි යන මහත්වරු පෙනී සිටියහ.
සැකකරු ඉදිරි වසර 07 තුළ කිසියම් වරදක වැරදිකරු වුවහොත් මෙම අත්හිටවූ සිර දඬුවම ක්‍රියාත්මක වන බව මහාධිකරණ විනිසුරුවරයා විත්ති පාර්ශ්වයට දැනුම් දුන්නේය.
මෙම තීන්දුව ලබාදීමෙන් පසු හිටපු වයඹ පළාත් සභා මන්ත්‍රී ආනන්ද සරත් කුමාර මහතා කියා සිටියේ අධිකරණය ලබාදුන් තීන්දුව හිස නමා ගෞරවයෙන් පිළිගන්නා බවයි. නඩු තීන්දුවෙන් පසු මාධ්‍යයට අදහස්‌ දැක්‌වූ ආනන්ද සරත් කුමාර මහතා මෙසේ කීය.
"මම වරදකරු වුණේ මිනී මරල, මංකොල්ලකාල නොවෙයි. ගුරුවරියකට හිංසා පීඩා කළා කියලයි. නඩු තීන්දුව ලබාදුන් අධිකරණයට හා තීන්දුවට මම ගරු කරනවා"
අධිකරණයෙන් පිටතට පැමිණි සුසිලා හේරත් ගුරුතුමිය, "මාස එකොළහක්‌ තිස්‌සේ ගුරුවරියක්‌, මවක්‌ හා කාන්තාවක්‌ වශයෙන් මා විඳි පීඩාව රිදුම දන්නේ මා පමණයි. මා විඳි අපහාසයට කවදා හෝ යුක්‌තිය, සාධාරණය ඉටුවනු ඇතැයි මා සෑම පැයකම, රැයකම අපේක්‍ෂා කළා. අයියනායක දෙවිඳුන්ට කීවා."
අද යුක්‌තිය, සාධාරණත්වය ඉටුවුණා. රටේ අධිකරණය ගැන ලොකු විශ්වාසයක්‌ අපට ඇතිවුණා. මෙහි ජයග්‍රහණය, රටේ සමස්‌ත ගුරු පරපුරටයි. ශිෂ්‍ය ප්‍රජාවටයි. කාන්තා පරපුරටයි.
මා වේදනා වින්දාට මට හැකිවුණා ඔවුන් සෑම දෙනා වෙනුවෙන් යුක්‌තිය ඉදිරියේ දණින් නොවැටී සිටීමට. දේශපාලකයන් දණගැස්‌සුවාට සාධාරණත්වය, යුක්‌තිය, නීතිය දණගැස්‌සවීමට බැහැ."
සමස්‌ත ලංකා ගුරු සංගමයේ ජෝශප් ස්‌ටාලින් මහතා ද මෙහිදී කතා කළේය.
සමස්‌ත ලංකා කාර්ය නියුතු විදුහල්පති සංගමයේ ප්‍රධාන ලේකම් පියසිරි ප්‍රනාන්දු මහතා -
තමන්ගේ පාසලේ ගුරුතුමියට විරුද්ධව නවගත්තේගම විදුහලේ නි. විදුහල්පතිවරයා දේශපාලකයකුට පක්‍ෂපාතීව බොරු සාක්‍ෂි දීලා ගුරුතුමිය පාවා දුන්නා. එය අධිකරණය ද බොරු සාක්‍ෂි ලෙස හැඳින්වූවා. මෙම ගුරුවරයාට විරුද්ධව අපි දෙපාර්තමේන්තුවට කරුණු ඉදිරිපත් කරනවා.
