ජාතික ළමාරක්‍ෂක අධිකාරිය විසින් සිදුකළ විමර්ශනයක්‌ අනුව අත්අඩංගුවට ගෙන මෙලෙස රක්ෂිත බන්ධනාගාර ගත වූයේ රාගම පදිංචි රොඩ්නි පෙරේරා නමැති සැකකාර පාස්‌ටර්වරයාය.
සැකකරු අධිකරණය හමුවට ඉදිරිපත් කරමින් කරුණු දැක්‌වූ ජාතික ළමා රක්‍ෂක අධිකාරිය ක්‍රිස්‌තියානි පූජකවරුන් පිරිසක්‌ කරන ලද දැනුම්දීමක්‌ අනුව මෙහි විමර්ශන සිදුකර සැකකරු අත්අඩංගුවට ගත් බවත් සිද්ධියට අදාළව තවදුරටත් පරීක්‍ෂණ පවත්වන බැවින් සැකකරු රක්ෂිත බන්ධනාගාර ගත කර තබන ලෙසත් ඉල්ලා සිටියේය.
ක්‍රිස්‌තියානි පූජකවරයකු ලෙස පෙනී සිටින සැකකරුගේ බාරකාරත්වයේ පවතින ජාඇල හාවස්‌ට්‌ ළමා නිවාසයේ දිවයිනේ විවිධ ප්‍රදේශවල වයස අවුරුදු 6 ත් 15 ත් අතර පිරිමි ළමුන් 21 දෙනකු හා ගැහැනු ළමුන් 10 දෙනකු රැකවරණය ලබන බවත් ඔවුන් අතර ගැහැනු ළමුන් සිවු දෙනකුහට සැකකරු කාලයක්‌ තිස්‌සේ ලිංගික අතවර කරමින් ඔවුන්ව බරපතළ ලිංගික අපයෝජනය ලක්‌ව ඇති බවත් දන්වා සිටි ළමාරක්‍ෂක අධිකාරිය ඒ සම්බන්ධයෙන් වින්දිත දැරියන්ගෙන් හා ළමා නිවාස පාලිකාවගෙන් ලබාගත් ප්‍රකාශ තුළින් කරුණු අනාවරණය වී ඇති බව කියා සිටියේය.
සිද්ධියට අදාළව තවදුරටත් පරීක්‍ෂණ කටයුතු සිදු කරන බැවින් සැකකරු රක්ෂිත බන්ධනාගාර ගත කර තබන ලෙසද ඉල්ලා සිටි ළමාරක්‍ෂක අධිකාරිය වින්දිත දැරියන් සම්බන්ධයෙන් වෛද්‍ය වාර්තා කැඳවීමට කටයුතු යොදා ඇති බවත් ඒ පිළිබඳව ඉදිරියේදී වාර්තා ගොනු කරන බවත් පැවසුවේය.
සැකකරු වෙනුවෙන් පෙනී සිටි නීතිඥ අශෝක වීරසූරිය මහතා කරුණු දක්‌වමින් ළමාරක්‍ෂක අධිකාරියේ එකම ඉල්ලීම සැකකරු රක්ෂිත බන්ධනාගාරගත කිරීම පමණක්‌ බවට පෙනී යන බවක්‌ පරීක්‍ෂණ වලට තමන්ද සහාය දැක්‌වීමට සූදානම් බැවින් ඕනෑම කොන්දේසියක්‌ මත ඇපයක්‌ නියම කර මුදාහරින ලෙසත් ඉල්ලා සිටියේය.
ඉදිරිපත් වූ කරුණු කෙරෙහි සැලකිලිමත් වූ මහෙස්‌ත්‍රාත්වරිය සැකකරු ලබන 29 දා තෙක්‌ රක්ෂිත බන්ධනාගාර ගතකර තබන ලෙසත් එදිනම වැඩිදුර වාර්තා ගොනු කරන ලෙසත් නියෝග කළාය.
