හම්බන්තොට දිස්ත්‍රික්කයේ කිසිම මන්ත්‍රීවරයකු හෝ එජාපයට සහ පොදු විපක්ෂයට සම්බන්ධ කිසිවෙකු පාර්ලිමේන්තු මන්ත්‍රී නාමල් රාජපක්ෂ මහතාට මරණ තර්ජන නොකරන බවත් එම චෝදනා මන්ත්‍රීවරයා ඔහුට එල්ල වී ඇති චෝදනා වලින් මිදීමට ගන්නා උපාය මාර්ගයක් බවත් දකුණු පළාත් සභා එජාප මන්ත්‍රී නිහාල් වෙදආරච්චි මහතා පවසයි.
ඒ මහතා එසේ පැවසුවේ පාර්ලිමේනතු මන්ත්‍රී නාමල් රාජපක්ෂ මහතා මාධ්‍යයට කරන ලද ප්‍රකාශයට පිළිතුරු වශයෙනි. මෙහි දී වැඩිදුරටත්
අදහස් දැක් වු මන්ත්‍රීවරයා මෙසේ ද පැවසීය,
අපි හිටපු ජනාධිපතිරයාට තියෙන්නේ ගෞරවයක්. ඒ මේ රට ත්‍රස්තවාදීන්ගෙන් බේරාගත් නිසා. ඒ ගෞරවය නිසා අපි හම්බන්තොට ජයග්‍රහණයෙන් පසු පෙළපාලි ගියේ නෑ. කිරිබත් කෑවේ නෑ.
අපි අපේ ජයග්‍රහණය නිහතමානීව සැමරුවා. නමුත් සන්ධානය ජයගත්තා නම් තත්ත්වය වෙනස්. එමෙ කරපු අපිට දැන් නාමල් රාජපක්ෂ මන්ත්‍රීවරයා චෝදනා කරනවා මාධ්‍ය හරහා මරණ තර්ජන තිබුණු බවට මම කියන්නේ අපිට හම්බන්තොට පොදු විපක්ෂයේ කිසිම කෙනෙකුට එහෙම අවශ්‍යතාවයක් නෑ.
අපි දැන් සිදු කරන්නේ යහ පාලනයක්. අනිත් එක එතුමාගේ පියා වන හිටපු ජනාධිපතිවරයාට අපේ ගෞරවක් තිබෙනවා. නාමල් රාජපක්ෂ මන්ත්‍රීවරයාට එල්ලවන නොයෙකුත් චෝදනා වසා ගන්නා දැන් මෙවැනි මාධ්‍ය මෙහෙයුම් සිදු කරනවා.
හම්බන්තොට දිස්ත්‍රික්කයේ දේශපාලඥයන් විදියට මම වගකීමෙන් කියනවා ඔය නාමල් රාජපක්ෂ මන්ත්‍රීවරයා කියු ආකාරයේ කිසිදු තර්ජනයක් අපේ පැත්තෙන් නම් සිදු නොවු බව. ඒ සමඟම අපි ඉල්ලා සිටිනවා එතුමාගේ ආරක්ෂාව සපයන ලෙසත්. මේ නව රජය කිසිදු ආකාරයකින් නීතියට පිටින් කිසිවක් කරන රජයක් නොවෙයි.
අපේ පොරොන්දුවත් එයයි. අපි ක්‍රියාත්මක කරන්නෙත් එයයි. අපේ පාලනයේ ප්‍රධාන දේ නීතිය සැමට එකයි කියන එක. එසේම මම නාමල් මන්ත්‍රීවරයාගෙන් ද ඉල්ලා සිටිනවා ජනතාව නොමඟ යවන ප්‍රවෘත්ති පල නොකරන ලෙස.
