ගින්නලිය විදුහල ළඟ කඳුළු ගඟක්‌ වුණු හැටි..
පාසල ඉදිරිපිට දැවැන්ත විරෝධතාවක්‌
බෙරලපනාතර, ගින්නලිය මහා විද්‍යාලය ඉදිරිපිටදී 2 වසර ඉගෙනුම ලබන පාසල් සිසුවකු ලොරි රථයකට යටවීමෙන් එම ස්‌ථානයේදීම මිය ගොස්‌ තිබෙනවා.
ඊයේ (08 දා) දහවල් පාසල නිමවී මහාමාර්ගයට පැමිණි අවස්‌ථාවේ අධික වේගයෙන් පැමිණි ලොරි රථයට යට වීමෙන් මෙම සිසුවා අවාසනාවන්ත ලෙස මියගොස්‌ තිබෙනවා.
පාසල ඉදිරිපිට මාර්ගය කාපට්‌ කර ඇති අතර වාහන පාසල ඉදිරිපිටදී අධික වේගයෙන් ගමන් කරන බවද ප්‍රදේශවාසීහු පවසනවා.
අනතුරු සිදුවීමට ඉඩ ඇති බැවින් විදුහල්පතිවරයා ඇතුළු ප්‍රදේශවාසීන් පාසල ඉදිරිපිට මාර්ග බාධක යොදන ලෙස කොතෙක්‌ ඉල්ලීම් කළද බලධාරීන් මෙතෙක්‌ පියවරක්‌ ගෙන නොමැති බවද පැවසේ. මේ මාරක අනතුරින් පසු ප්‍රදේශවාසීහු පාසල ඉදිරිපිට දැවැන්ත විරෝධතාවක්‌ පැවැත්වූහ.
මෙම අනතුර සිදුවූ ස්‌ථානය අනතුරුදායක බැවින් පාසල් ගුරුවරුන් හා දෙමාපියන් කලක සිට කහ ඉරක්‌ පාර හරහා ඇඳ දෙන ලෙස බලධාරීන්ගෙන් ඉල්ලා සිටියද එය ඉටු වී නැත.
අනතුර සිදුවූ මොහොතේ රැස්‌වූ පිරිස පාර අවහිර කර විරෝධතාවක නිරතවූ අතර රජයේ දෙපාර්තමේන්තුවකට අයත් ලොරි රථය හා රියදුරු පොලිසිය මගින් අත්අඩංගුවට ගෙන ඇත.
